Á þeim umrótatímum sem nú ganga yfir íslenskt samfélag mæðir mikið á fjölmiðlum og fólk horfir til þeirra til að skýra frá því sem gerist. Athyglisvert hefur verið að fylgjast með þeim meðan mesta öldurótið hefur gengið yfir og þá sérstaklega hvernig sumir fjölmiðlamenn hafa tekið að sér að vera sérlegir talsmenn “almennings” eða “þjóðarinnar”.
Æsifréttamennska heillar marga fjölmiðlamenn á Íslandi en það kom glögglega í ljós í aðdraganda hruns bankanna þegar frétta – og blaðamenn kepptust við að elta stjórnmálamenn uppi og flottast þótti auðvitað að öskra á eftir þeim, sitja fyrir þeim eftir fundi eða hreinlega liggja á gluggum. Sá sem lengst gekk þótti mest töff.
Nú í haust, þegar daglegir blaðamannafundir stóðu fjölmiðlum til boða, komst upp um vankunáttu fjölmargra fjölmiðlamanna. Þá þurfti nefnilega að leggja æsifréttamennskuna til hliðar og spyrja efnislegra spurninga og fá svör. Sumir virtust hreinlega ekki vita hvað átti að spyrja um og komu heldur kjánalega út. Sást þá greinilegur munur á íslensku og erlendu fréttamönnunum.
Helsti galli margra íslenskra fjölmiðlamanna er nefnilega þörf þeirra fyrir að koma sjálfum sér á framfæri. Í stað þess að miðla upplýsingum reyna sumir fjölmiðlamenn að koma eigin skoðunum á framfæri og fréttin sjálf fellur í skuggann.
Það sem er kómískt í þessu öllu er hvernig fjölmiðlamenn skýla sér á bakvið klisjur til að koma eigin skoðunum að eða til að hylma yfir illa undirbúna fréttavinnslu. Klassískt er að slá upp setningum á borð við “Þjóðin vill fá að vita...”, “Almenningur spyr sig..”, “Gárungarnir segja..” og svo elsta klisjan í bókinni: “Heyrst hefur..”. Annað hvort er talað fyrir hönd allrar þjóðarinnar eða reynt að hylma yfir lélega undirbúningsvinnu.
Skiptar skoðanir eru um fjölmiðla og sitt sýnist hverjum. Margir eru á þeirri skoðun að fjölmiðlar hafi brugðist eftirlitshlutverki sínu í þeirri kreppu sem nú gengur yfir. Þetta kom t.d. fram á fjölmennum borgarafundi á Nasa nýverið. En telja þá sumir, að fjölmiðlamenn séu að bregðast hlutverki sínu ef þeim tekst ekki “að grilla” stjórmálamenn og aðra viðmælendur?
Að sjálfsögðu eiga fjölmiðlamenn að spyrja hvassra spurninga og ekki leyfa viðmælendum sínum að komast undan því að svara erfiðum spurningum. Hárbeittur fjölmiðlamaður spyr spurninga sem eru til þess fallnar að upplýsa almenning. En ekki, eins og svo algengt er, að grípa sífellt fram í fyrir viðmælanda sínum og leyfa honum aldrei að ljúka svarinu og vera svo ótrúlega sáttur eftir á, enda situr viðmælandinn þá eftir “illa grillaður”. Að mati höfundar hafa fjölmiðlar einmitt brugðist hlutverki sínu þegar þeir falla í slíka gryfju. Málefnaleg og gagnrýnin umræða hlýtur að vera það sem hver fjölmiðlamaður vill standa fyrir.
Samfélagsleg ábyrgð fjölmiðla er einnig mikil og höfundi hugleikin, sem hefur áður fjallað um það á Deiglunni. Fólk treystir því að fjölmiðlar vandi til verka og segi satt og rétt frá. Þannig geta fjölmiðlar samt auðveldlega stjórnað almenningsálitinu. Í þessu sambandi verður ekki hjá því vikist að minnast á atburði þessa árs.
Í vor, þegar mótmæli vörubílstjóra stóðu sem hæst, sauð að lokum upp úr við Rauðavatn eins og frægt er orðið. Fjölmiðlar mættu á staðinn og bein sjónvarpsútsending hófst, sem varð til þess að fjölmargir lögðu leið sína uppeftir til að taka þátt í látunum. Ágætt dæmi um ófagleg vinnubrögð fjölmiðlamanna var þegar tiltekinn fréttamaður hugðist sviðsetja frétt fyrir myndatökumann og fá ungmenni til að kasta eggjum í lögregluna. Sami fréttamaður sá þó sóma sinn í því að segja starfi sínu lausu eftir þetta. Sjá má í hendi sér að mótmælin hefðu líklegast ekki farið svona svakalega úr böndunum ef fjölmiðlar hefðu ekki tekið jafn virkan þátt í þeim.
Án þess að gera lítið úr reiði fólks þessa dagana, sem er skiljanleg og eðlileg, þá verða fjölmiðlar að gera sér grein fyrir múgæsingi sem þeir geta skapað og þannig gert ástand verra en það hefði ef til vill orðið. Nýlegur fréttaflutningur frá uppþotum við lögreglustöðina í Reykjavík sýnir þetta glöggt. Í kvöldfréttum var aðalfréttin sú að lögreglan hefði beitt piparúða á fólk sem samkvæmt fréttinni var alsaklaust, enda bara að brjóta sér leið inn á lögreglustöðina til að sækja mann í haldi lögreglu! Fullkomlega eðlilegt, eða hvað?
Þegar fjölmiðlar leggja blessun sín yfir það að æstur múgur ráðist inn á lögreglustöð, þarf að staldra við og hugsa málin upp á nýtt. Slíkt sendir þau skilaboð út í samfélagið að ekki beri að fylgja lögum og reglum í landinu og að lögreglan sé ávallt vondi kallinn sem berji saklausa borgara. Þó að síðar hafi komið í ljós að svo virðist sem ekki hafi öllum reglum verið fylgt varðandi áðurnefnda handtöku, þá réttlætir það að sjálfsögðu ekki þá hegðun sem stór hópur af fólki sýndi af sér við lögreglustöðina. Allir hljóta að sjá að þróun sem þessi, er ekki af hinu góða.
Að lokum ætlar höfundur að leyfa sér að taka klisjur fjölmiðlamanna upp á sína arma: “Gárungarnir segja að ansi heitt sé orðið á fjölmiðla-grillinu og að tími sé til kominn að lækka hitann. Þjóðin öll heimtar málefnalega, gagnrýna og ábyrga fjölmiðlun þar sem grillveislum er stillt í hóf.”
Heitt á grillinu
Helga Lára Haarde þann 27.11.08
Svör:
Svara þessum pistli
Vinsamlega skráið fullt nafn með öllum svörum, verið málefnaleg og haldið ykkur innan marka almennrar kurteisi. Ritstjórn kærir sig ekki um að Deiglan sé vettvangur fyrir nafnlaust skítkast og áskilur sér fullan rétt til að velja og hafna svörum. Takk fyrir!
Um höfundinn
Fullt nafn:
Helga Lára Haarde
Fæðingard:
27. janúar 1984
Staða:
nemi
Menntun:
B.S. í sálfræði frá HÍ
hCard
- Af nýsköpunarfrumvarpi, gegnsæi og gráum markaði
- Hugsum í lausnum, kjósum Vöku!
- Vöku til forystu
- Er hægt að bæta ímynd Íslands?
- Er Arnold með einokun?
- Óli Örn: Sæll Gunnar og takk fyrir athugasemdirnar. "Voru hlutföll vinnandi fólks...
- Gunnar Jóhannss...: Áhugaverðar pælingar. Nokkrar spurningar sem vakna? Voru hlutföll vinnandi fólks...
- Pawel Bartoszek: Sælir báðir og takk fyrir athugasemdirnar, Mér sýnist í fljótu bragði sem...
- Guðmundur ásgei...: Í skýrslu Ríkisendurskoðunar um endurskoðun ríkisreiknings 2007 stendur orðrétt á...
- Ísland - Argentína
- Hinir syndlausu
- Sundurlyndi á ögurstundu
- Bábiljur ársins III - Útrásin var slæm
- Lögregla í hefndarhug?
Skráð þann 27.11.08 klukkan 08:05
Kærar þakkir fyrir þennan þarfa og ágæta pistil, Helga Lára.
Égh veit að margir eru þér sammála þótt þær raddir heyrist ekki í fjölmiðlum. Ekki þarf að spyrja hvers vegna þessar raddir heyrast ekki.
Í mínum huga tók steininn úr þegar gerð var árás á lögreglustöðina. Um þá staðreynd var einfaldlega ekki fjallað en þess í stað lögð áhersla á að fólki sem reyndi að brjótast inn í bygginguna hefði verið meinað það.
Frammistaða fjölmiðla fyrir hörmungarnar sem nú ríða yfir er vissulega gagnrýniverð. Frammistaðan á síðustu vikum er síst betri. Ég tel að mikil ástæða sé til að hafa áhyggjur af fjölmiðlun í landinu. Hún er afar veik, ófagleg um margt og ekki líkleg til afreka nú þegar þörfin er svo mikil sem raun ber vitni fyrir öfluga og upplýsandi fjölmiðla.
Takk.
Karl Einar
Skráð þann 27.11.08 klukkan 08:20
Við fáum alvöru fjölmiðlamenn þegar við fáum alvöru stjórnmálamenn.
Skráð þann 27.11.08 klukkan 08:42
Sæl.
Eftir allan þennan pistil um vanhæfni fjölmiðlamanna, þá kastarðu fram:
"Í kvöldfréttum var aðalfréttin sú að lögreglan hefði beitt piparúða á fólk sem samkvæmt fréttinni var alsaklaust, enda bara að brjóta sér leið inn á lögreglustöðina til að sækja mann í haldi lögreglu!"
"... enda bara..." ?
Er þetta eðlileg greining á þeim atburðum sem áttu sér stað?
Hún er það ekki miðað við allar þær fréttaskýringar sem ég hef lesið á netinu, sem bæði hafa tekið þína afstöðu og annarra.
Myndirðu fá háa einkunn hjá þínum háskólaprófessorum fyrir svona einfalda greiningu?
Fyrirgefðu, en þetta sýnir glöggt þá einstefnu sem er útgangspunktur þessa áróðurspistils. Vonandi verður þetta ekki línan sem þú ætlar að tileinka þér í framtíðinni.
Kveðja,
Kristján Gaukur Kristjánsson
Skráð þann 27.11.08 klukkan 09:25
Ég nenni ekki einu sinni að lesa þessa grein.
Skráð þann 27.11.08 klukkan 09:35
Ok, ágætis pistill.
En eigum við svo að ræða ábyrgð?
Skráð þann 27.11.08 klukkan 09:35
Taktu útúr þér gullskeiðina, farðu úr glerhúsinu, og farðu út á meðal almúgans,,gamlafólksins... Ellefu þúsund manns 65 ára eða eldri voru meðal þeirra hluthafa gömlu viðskiptabankanna þriggja sem töpuðu öllu hlutafé sínu við fall bankanna, ,,fólk er reitt fólk er svikið. Blaðamenn færa okkur þó einhverjar fréttir,,þeir grafa í skítahaugnum,,og lygta örugglega ylla fyrir vikið. Ég tek ofan fyrir blaðamönnum eins og td. Agnesi Bragadóttir, og öllum hinum .
Skráð þann 27.11.08 klukkan 09:48
Góður pistill í tíma skrifaður. Of margir fjölmiðlamenn eru of ástfangnir af sjálfum sér.
Skráð þann 27.11.08 klukkan 10:21
Sú þróun að lögreglan setur mótmælanda í fangelsi án þess að fara að lögum er ekki af hinu góða. Ef ekki hefði verið mótmælt er allt eins líklegt að hann hefði verið látinn dúsa áfram og ekkert þótt óeðlilegt við það.
Skráð þann 27.11.08 klukkan 10:25
Já, þetta er góður pistill hjá þér. Ég held barasta að ég sé sammála þér að flestu leyti.
Mér finnst fjölmiðlar ekki hafa staðið undir sinni ábyrgð í gegnum þetta allt undanfarið. Það viðurkennist þó að ef fjölmiðlar hefðu gengið eins hart og þeir hefðu þurft að ganga til þess að ná fram upplýsingunum sem vantaði til þess að stöðva framferði ýmissa manna í þjóðfélaginu hefðum við líklegast úthrópað það sem æsifréttamennsku. Þar liggur ábyrgð okkar allra, allaveganna hvað fjölmiðlakrísuna varðar.
Varðandi innrásina á lögreglustöðina og fréttaflutninginn af Rauðavatni í sumar fannst mér fjölmiðlar þó fara offari í múgæsingnum. Á rauðavatni gargaði fréttamaður RÚV (man ekki hvað hann heitir) í hljóðneman að lögreglan væri að ráðast á fólkið, færi offari og beitti ofbeldi. Á Hverfisgötu voru þeir engu betri, verri ef eitthvað var. Lýsingarnar voru akkúrat eins og þú lýstir. Það var ekkert minnst á það að þarna var hópur svokallaðra "aðgerðarsinna" að gera tilraun til þess að vega að fullveldi ríkisins! Þetta er EKKI gildishlaðin lýsing heldur hlutlaus staðreynd sem sést með léttum lestri á stjórnarskrá með hliðsjón af lögrelgulögum og almennum hegningarlögum.
...gangi þér annars bara vel. :)
Skráð þann 27.11.08 klukkan 10:25
Ef þú ert dóttir forsætisráðherrans þá held ég að það fari best á ÞVÍ að þú blandir þér ekki í umræðuna um ástandið vegna þess að þú verður alltaf´hludræg og ósannfærandi í augum almúgans.
Skráð þann 27.11.08 klukkan 10:25
Spurning fyrir þig Helga, fyrst þér finnst með öllu ótækt að múgurinn brjóti sér leið inn á löggustöðina
Hvers virði er réttarríkið og lög þegar elítan sleppur með allann fjandann ?????
Skráð þann 27.11.08 klukkan 10:39
Flott grein og margt sem vekur mann til umhugsunar.
Eitt vill ég þó koma inná út frá athugasemdunum, persónulegt skítkast á höfund greinarinnar þykir mér afskaplega barnalegt. Málefnaleg gagnrýni á greinina er allt annað því auðvitað höfum við öll rétt á okkar skoðunum líkt og höfundurinn sjálfur.
Það að segja að blaðamenn gefi okkur þó einhverjar fréttir er nákvæmlega það sem höfundur greinarinnar er að gagnrýna. Að í stað þess að gera vandaðar fréttir og spyrja viðmælendur sína að hárbeittum spurningum sem veita almenningi góð svör eru fréttamenn í þessum æsifréttaleik þar sem viðmælendum gefst oftar en ekki lítill eða enginn tími til að svara ítarlega og almennilega.
Ég er ekkert minna reið og svekkt yfir ástandinu en besta leiðin til þess að vinna sig útúr þessu einmitt að nota reiðina á uppbyggilegan hátt og ef fólk er ekki ánægt með þá stjórnmálamenn sem sitja núna er hægt að láta þá axla ábyrð í næstu kosningum. Meirihluti þjóðarinnar valdi sér þessa fulltrúa fyrir 2 árum til þess að starfa í okkar umboði næstu 4 árin. Ef við erum ekki sátt við það hvernig þau hafa tekið á málunum á fólk ekki að hika við að sýna það í næstu kosningum eins og áður sagði.
Skráð þann 27.11.08 klukkan 10:45
TAKK FYRIR ÞENNAN PISTIL
Ég verð að segja að þessir fjölmiðlafundir komu miklu betur út fyrir ráðherra heldur en þá fjölmiðlamenn sem ekki kunna að afla sér upplýsinga áður en á fundinn er komið. Fjölmiðlar eru að moka yfir eigin skít með því að moka upp skít annarra.
Skráð þann 27.11.08 klukkan 10:50
Vel skrifaður pistill. Hnitmiðaður og greinagóður.
En ég er að mestu ósammála gagnrýni þinni á fjölmiðlamenn. Vandamálið hefur einmitt frekar verið að fjölmiðlamenn hafi verið of hallir undir stjórnvöld og auðmenn.
Þessi greining og setning stakk mig sérstaklega:
"Sjá má í hendi sér að mótmælin hefðu líklegast ekki farið svona svakalega úr böndunum ef fjölmiðlar hefðu ekki tekið jafn virkan þátt í þeim."
Þetta er fáranleg og absúrd greining hjá þér. Þrátt fyrir umrætt atvik þar sem blaðakona í bríaríi stakk upp á sviðsetningu á eggjum þá er algjörlega út í hött að áætla að nærvera fjölmiðla sé ábyrg fyrir uppþotum eða ágeri uppþot. Að hvetja fjölmiðla til að koma ekki nálægt mótmælum til að draga úr mótmælum er í sjálfu sér mikill ábyrgðarhluti. Leynd og undirlægjuháttur eru verstu óvinir lýðræðins.
Skráð þann 27.11.08 klukkan 10:51
Eins og talað út úr mínum munni. Því almenninur er farin að tala svona líka. Eins og á borgarafundinum og á austurvelli.
Við almenningur viljum ykkur burt o.s.frv. Er þetta svo á austurvelli er bara 2% þjóðarinnar slatti af börnum líka sem hafa ekki hugmynd hvað þau eru að gera þarna.0,5% var´á borgarafundinum og en minna utan löggustöðina.sorry mótmælendur tölurnar tala sínu máli.
Skráð þann 27.11.08 klukkan 11:03
Góða besta... slepptu þessu bara
Skráð þann 27.11.08 klukkan 11:29
Ég get tekið undir að umfjöllun fjölmiðla mætti vera yfirvegaðri, en mun meiri dýpt þarf í rannsóknum þeirra og hefði þurft á umliðnum árum. Þá væri staðan sennilega ekki eins og hún er núna. Þegar ríkisvaldið bregst skyldum sínum eiga fjölmiðlarnir að taka við en það hafa þeir ekki gert
Skráð þann 27.11.08 klukkan 11:36
Mjög góð grein.
Ég hvet þig eindregið til þess að láta allt skítkast lönd og leið.
Skráð þann 27.11.08 klukkan 12:08
Mér finnst ótrúlegt hvað fólk er svakalega dónalegt í kommentum sínum, óþarfi að vera með skítkast þó maður sé ekki sammála pistlahöfundi.
Annars finnst mér þetta góð grein og ég er að mörgu leyti sammála þér.
Skráð þann 27.11.08 klukkan 12:13
Sé að Vendetta er mætt á svæðið, málefnaleg sem aldrei fyrr. Ég er sammála innihaldi greinarinnar, þetta er því miður ekkert nýtt, en kemur glögglega í ljós í núverandi ástandi. Við munum öll hvernig Helgi Seljan gerði tilraun til að "grilla" Jónínu Bjartmarz en kom þess í stað illa út úr því sjálfur. Illt er að fjölskyldutengsl pistlahöfundar skuli valda því að hún geti ekki lagt neitt til málanna, og það um fjölmiðla. Commentin hér eru mörg hver ómerkileg og út fyrir efnið.
Skráð þann 27.11.08 klukkan 12:16
Ég átti að sjálfsögðu við að fjölskyldutengsl eiga ekki að koma í veg fyrir að pistlahöfundur tjái sig. Illt að fólk skuli líta svo á að hún megi ekkert leggja til málanna bara vegna þess í hvaða fjölskyldu hún er fædd. Það á ekki að valda því að hún megi ekki tjá sig, slíkt er bara fráleitt í alla staði.
Skráð þann 27.11.08 klukkan 12:23
Að mörgu leiti áhugaverð grein hjá þér, og er ég sammála mörgu sem þar fer fram, ég er ekki hissa á þvi að lögregla hafi beitt piparúða og í þessu tilfelli fannst mér það fullkomlega réttlætanlegt.
Hinsvegar verður líka að athuga það að lögregla braut lög með þvi að handtaka piltinn, það hefur komið opinberlega í ljós og lögregla viðurkennt það. Reiði fólksins var að því leiti réttmæt að mínu mati.
Mér finnst leiðinlegt hvað margir hérna senda þér eitthvað skítkast bara af þvi að þú ert dóttir Geirs, Sjálfur er ég ekki sammála þvi sem faðir þinn hefur verið að gera og hvernig hann hefur komið fram við fjölmiðla og þjóðina, það á kannski sinn þátt í þvi að fjölmiðlar hafa jafnvel tekið stöðu gegn honum, en mér finnst alveg ótækt að það sé ráðist að þinni persónu, láttu ekki svona skítkast hafa áhrif á þig.
Skráð þann 27.11.08 klukkan 12:54
Þakka góðann pistil, er sammála.
Kv. Sigurjón Vigfússon
Skráð þann 27.11.08 klukkan 13:20
Flottur pistill!
Skráð þann 27.11.08 klukkan 14:00
Þetta eru að sönnu orð í tíma töluð og kominn tími til að benda fólki á að fjölmiðlaumfjöllun í landinu er einsleit. Því miður virðast margir hins vegar gera upp hug sinnn varðandi hin ýmsu málefni út frá umfjöllun fjölmiðla.
Skráð þann 27.11.08 klukkan 14:00
Veistu að ef ég set nafn pabba þíns í stað orðsins fjölmiðlamanna þá birtist mér fullkomin lýsing á hegðun hans. Þú gagnrýnir fjölmiðla án þess að nefna að faðir þinn er sekur um alla þessa gagnrýni sjálfur! Það er langt síðan Geir var málefnalegur, líttu þér nær kona!
Skráð þann 27.11.08 klukkan 14:04
Meiri múgæsingur er einmitt það sem vantar!!!
Held að þú sért bara hrædd við sandinn sem húsið ykkar er að sökkva ofan í þessa dagana.
Skráð þann 27.11.08 klukkan 14:07
þessi grein er eins og ég myndi skrifa gagnrýni á ríkisstjórnina og taka fjölmörg dæmi en tala alltaf um "ríkisstjórnina" en tilgreina aldrei hvaða meðlimi ríkisstjórnarinnar, hvaða fjölmiðla og fjölmiðlamenn ertu að tala um? Eða þorirðu ekki að gagnrýna þá beint? Í raun má taka undir sumt af því sem þú ert að segja, en að fullyrða að fjölmiðlar á Íslandi séu í krossferð gegn pabba þínum er laaanngt frá raunveruleikanum, ef eitthvað er eru þeir allt of linir!
Skráð þann 27.11.08 klukkan 14:29
Góð grein hjá þér.
Skráð þann 27.11.08 klukkan 14:30
Við lifum á öfgafullum tímum, sú staða sem uppi er í íslensku samfélagi í dag er vonandi eins dæmi og ég held að fjölmiðlarnir endurspegli dálítið þessa öfgafulla aðstæður.
Ég er að miklu leiti sammála þér en ég sem "neytandi" er ég almennt mjög gagnrýnin á það sem fjölmiðlarnir eru að mata mig á, sem er nauðsynlegt.
Vonandi sjáum við uppstokkun í fjölmiðlunum eins og ég vonast til að sjá á hinu pólitíska sviði og almennt í þeim miklu samfélagslegu breytingum sem ég sé fyrir mér að séu óhjákvæmlegar á næstuni.
Að lokum finnst mér dónaskapur ekki vera málefnalegur í þessari umræðu, það er hægt að tjá skoðanir sínar án hans.
Skráð þann 27.11.08 klukkan 14:36
Ágæta Helga Lára,
Þetta er góður pistill og efnislega heill. Ég tek hjartanlega undir með þér í gagnrýni á fjölmiðla þar sem mest er lagt upp úr grunnum æsifréttum, en dýpri umræður sniðgengnar, líkast til vegna vanþekkingar spyrla á umræðuefninu.
Fjölmiðlun hefur hrakað til muna undanfarin misseri, þegar litið er til almennilegra fréttaskýringa. Kastljós, sem á að vera fréttaskýringaþáttur, er orðinn dæmigerður "infotainment" þáttur að amerískri fyrirmynd. Þar er iðulega boðið upp á þrennt; þras, mas og músík.
Alla dýpt vantar í málefnin.
Hvað viðkemur forsætisráðherra, sem vill svo til að er faðir þinn, þá verður illu heilli ekki undan því vikist að gagnrýni á hann er verðskulduð. Fyrir það fyrsta, þá ber hann gríðarlega ábyrgð á þeirri stöðu sem við erum komin í. Þar telst til aðkoma hans að einkavæðingu bankanna og regluverki því sem þeir búa við, auk þess að hafa skipað Davíð Oddsson sem seðlabankastjóra. Þá hefur hann orðið margsaga um lykilatriðið og þætti í kringum bankahrunið. Alla þessa ábyrgð verður forsætisráðherra að axla. Því tel ég að það verði aðeins þér til hugarangurs að reyna að bera blak af honum gagnvart fólki sem margt hvert hefur misst atvinnuna og ævisparnaðinn og horfir jafnvel fram á persónulegt gjaldþrot vegna atburðarásar sem hefði verið hægt að draga úr, ef ekki umflýja alveg, ef forsætisráðherra og ríkisstjórn hans hefði hlýtt á viðvaranir sérfræðinga.
Með kveðju,
SIJ
Skráð þann 27.11.08 klukkan 14:38
Orð í tíma töluð! Flott hjá þér!
Skráð þann 27.11.08 klukkan 15:11
Algjört kjaftæði! Ef eitthvað er þá þurfa fjölmiðlarnir að vera ennþá harðari og krefja þessa vitleysinga um svör sem þeir sneiða alltaf framhjá! Fjölmiðlarnir hafa verið vel undirbúnir en virðast alltaf hlífa landráðamönnunum, eins og t.d. föður þínum við erfiðustu spurningunum. Þannig að fjölmiðlar haldiði áfram að grafa upp staðreyndir um spillta stjórnarhætti Geirs og félaga, en Geir og félagar komið ykkur í burtu og það sem lengst í burtu!
Skráð þann 27.11.08 klukkan 15:11
Er ekki kunnar ástæður fyrir því að fjölmiðlamenn nota þessi orð eins og "þjóðin vill fá að vita" og "heyrst hefur" og fleir í þessum dúr ?
Jú .. það er vegna þess að stjórnvöld í landinu hafa skapað svo mikla óvissu með þeirri stefnu sem Seðlabankastjóri kallar "Þjóðin veit ekki neitt" stefnuna. Þar sem almenningur fær ekki að vita neitt og situr eftir í algjörri óvissu.
Þannig verða til samsæriskenningar og sögusagnir sem fréttamenn fara og spurja æðsta mann stjórnvalda um hvort einhver rök séu fyrir hendi.
Skráð þann 27.11.08 klukkan 16:02
Ef þú spyrð heimskulega þá færðu auðvitað ekki gáfulegt svar......
Að leiðtogar landsins þurfi að vera að svara spurningum frá fólki sem mun aldrei koma til með að skilja svarið er náttúrulega alveg út í hött, vont að útskýra fyrir manni sem vill verðtrygginguna burt ef hann hefur ekki hugmynd um hvaða hlutveki hún gegnir öðru en því að lánið hans hækki.
Held að fólk ætti að fara að læra að hegða sér og gefa ráðamönum frið til að vinna!
Skráð þann 27.11.08 klukkan 16:20
Í frétt á visir.is segir m.a.: "Helga segir að fjölmiðlar hafi brugðist hlutverki sínu. Það hafi meðal annars komið fram á fjölmennum borgarafundi sem haldinn var á Nasa. Helga minnist þó ekki á þá háværu gagnrýni sem komið hefur fram á ríkisstjórn föður hennar á fjölmörgum borgarafundum sem haldnir hafa verið."
Mér er ógerlegt að skilja af hverju er verið að blanda föður Helgu í málið. Hún er að skrifa um frammistöðu fjölmiðla, ekki föður síns eða ríkisstjórnar. Hennar gagnrýni stendur algjörlega, óháð áliti hennar á ríkisstjórninni eða pabba sínum. Rökvillurnar eru svæsnar þessa dagana. "Frétt" visir.is (og fyrirsögn) rennir stoðum undir gagnrýni Helgu.
Skráð þann 27.11.08 klukkan 16:59
Það var sorglegt að horfa á beinar útsendingar frá blaðamannafundunum í október. Þeir innlendu blaðamenn sem voru á staðnum virtust ekki skilja grunn hagfræði, og gátu ekki spurt þeirra spurninga sem komu strax í huga minn. Þeir erlendu spurðu örlítið betri spurninga.
Það er krafa mín, og vonandi þjóðarinnar að blaðamenn spyrji spurninga sem almenningi jafnvel detti ekki í hug. Eins og t.d. hvort eina hagfræðinginum í ríkisstjórn finnist eðlilegt að AGS geti breytt vöxtum á tveggja vikna fresti...
Skráð þann 27.11.08 klukkan 17:50
hér er en klisjan... "nú er botninum náð..."
Skráð þann 27.11.08 klukkan 18:02
Er það fjölmiðlum að kenna að þúsundir fjölskyldna sjá fram á að missa allt sitt á næst mánuðum og er það fjölmiðlum að kenna að reyðin úti í samfélaginu er að ná suðumarki?
Það er fyrst og fremst Sjálfstæðisflokknum og þeim valdhroka sem þar viðgengs að kenna að allt er farið úr böndunum, það er í besta falli barnaskapur og versta falli heimska að halda annað.
Þessi sorglega grein lýsir hugsunarhætti dæmigerðs sjalla betur en nokkuð annað.
Skráð þann 27.11.08 klukkan 18:50
Mjög góður pistill hjá þér Helga Lára og ég er þér svo hjartanlega sammála! Margir fjölmiðlamenn eru sannarlega farnir að elta uppi "villingana í hverfinu" til þess að fá æsifréttir.
Í mínu gamla hverfi voru villingar nú yfirleitt bara hunsaðir þangað til að þeir létu af ólátum sínum eða voru settir í skammarkrókinn! Þetta gerði það að verkum að aðrir krakkar gátu sinnt sínum verkefnum án vandræða eða ótta.
Það er auðvitað hræðilegt ástand í þjóðfélaginu í dag en þarf virkilega að ráðast á lögreglustöðvar og klifra upp á byggingar með bónusfána til þess að sýna reiði? Hver er ekki hræddur við svona sturlað fólk?
Ég vil einmitt fá faglega umfjöllun fjölmiðla um hvað er í gangi. Ég hef ekki áhuga á ógagnrýndum og gölnum tillögum örlítils hluta þjóðarinnar t.d. um "fulltrúa almennings" á ríkisstjórnarfundum eða í nefndum. Tillögur sem ganga út á það að allra mestu róttæklingarnir setji saman lista af Bibbu frænku sinni, Jónsa skro, og fleiri slíkum og leyfi okkur kjánaprikunum að kjósa um sinn lista á netinu!
Ég held að fagleg umfjöllun fjölmiðla sé lágmarkskrafa almennings á þessum umrótatímum. Að þeir í það minnsta hætti að kinka bara kolli við gjörsamlega sturluðum hugmyndum róttæklinga og spyrji þá líka spurninga.
Skráð þann 27.11.08 klukkan 18:57
Sæl
Greinin er fín og á alveg rétt á sér.
Fjölmiðlar landsins eru litaðir að eignahaldinu.
En ekki má gleyma að Ruv sem er í eigu landsmanna en ekki ríkissjórnarinnar,
þar virðist vera sömu fagmennsku að finna og á hinum miðlunum.
Saman ber hótun Páls Magnússonar um lögsókn vegna "erfiðra spurninga".
Hitt er svo annað mál að tengsl þín lita líka grein þína þannig að niðurstaðan hlýtur að vera: Ekki skal kasta stein úr glerhúsi !
Skráð þann 27.11.08 klukkan 20:56
,,Það segja börnin sem fyrir þeim er haft" !
Þöggun eða ljúga !
Þetta er það sem faðirinn hefur gert !
Reyna svo að kenna öðrum um ?
Skráð þann 27.11.08 klukkan 22:46
Æi í guðana bænum gott fólk. Farið með ómálefnalega umræðu annað..
Skráð þann 27.11.08 klukkan 23:38
Flottur pistill hjá þér Helga Lára... ég er sammála þér:) það er ýmislegt sem fólk sér ekki fyrir látunum í sjálfum sér... ef fólk tæki kannski eins og eitt skref aftur á bak og skoðar farinn veg, þá sést að það er ekki eingöngu hægt að benda á ríkisstjórn og kenna þeim um... margt mátti betur fara, en margt hefur líka gengið upp... fólk áttar sig bara engan vegin á hvernig hlutirnir eru í raun.
þó þú sért dóttir pabba þíns þá eru þetta alveg orð sem eiga rétt á sér varðandi málið... það skiptir engu máli frá hverjum þau koma.
Skráð þann 27.11.08 klukkan 23:44
Almáttugur...
að segja „Það sem er kómískt í þessu öllu er hvernig fjölmiðlamenn skýla sér á bakvið klisjur til að koma eigin skoðunum að eða til að hylma yfir illa undirbúna fréttavinnslu. Klassískt er að slá upp setningum á borð við “Þjóðin vill fá að vita...”, “Almenningur spyr sig..”, “Gárungarnir segja..” og svo elsta klisjan í bókinni: “Heyrst hefur..”. Annað hvort er talað fyrir hönd allrar þjóðarinnar eða reynt að hylma yfir lélega undirbúningsvinnu.“
og segja svo nokkrum orðum síðar
„Margir eru á þeirri skoðun að fjölmiðlar hafi brugðist eftirlitshlutverki sínu í þeirri kreppu sem nú gengur yfir.“
Þarna fellurðu sjálf í eigin gryfju. Þú ættir að lesa textann þinn betur yfir áður en þú birtir hann... ef þú ætlar þér að öðlast virðingu sem penni á eigin verðleikum en ekki út af nafninu.
Skráð þann 28.11.08 klukkan 01:27
Sæl og blessuð.
Voðalega ert þú blinduð af pabbapólitík! Tæplega sex af hverjum tíu kjósendum vilja flýta alþingiskosningum ef marka má skoðanakönnun sem Capacent Gallup hefur gert fyrir vefritið Smuguna!!!! Samkvæmt skoðanakönnun Fréttablaðsins er þetta hlutfall enn hærra. Þar að auki hafa fleiri þúsund manns komið reglulega saman undafarnar 6 vikur til þess að krefjast afsagnar ríkisstjónarinnar, og fer sá fjöldi sívaxandi! Er ekki kominn tími til að tileinka sér sjálfstæða hugsun? Síðast er ég vissi þá var Ísland lýðræðisríki, og vilji menn bera virðingu fyrir því er þeim skylt að fara eftir meirihlutavilja þjóðarinnar. Annað er valdhroki!
Skráð þann 28.11.08 klukkan 02:19
"...sumir fjölmiðlamenn hafa tekið að sér að vera sérlegir talsmenn "almennings" eða "þjóðarinnar"
Hvers vegna setur þú okkur innan gæsalappa, er það til að gefa í skyn að við skiptum ekki máli í samhengi stjórnmálanna?
"...blaðamenn kepptust við að elta stjórnmálamenn uppi ... sitja fyrir þeim eftir fundi eða hreinlega liggja á gluggum. Sá sem lengst gekk þótti mest töff."
Hlutverk fréttamanna er að afla upplýsinga og bera þær á borð fyrir almenning. Það segir nú bara sína sögu um framkomu ráðamanna ef það þarf að elta þá uppi og sitja fyrir þeim til að fá einhver svör. Það þyrfti enginn að liggja á gluggum ef ekki væri farið í felur með mikilvæg málefni.
"Nú í haust ... komst upp um vankunáttu fjölmargra fjölmiðlamanna. Sumir virtust hreinlega ekki vita hvað átti að spyrja um og komu heldur kjánalega út. Sást þá greinilegur munur á íslensku og erlendu fréttamönnunum."
Um svipað leyti komst upp um vankunnáttu ýmissa stjórnmálamanna. Sumir virtust hreinlega ekki vita hvað ætti til bragðs að taka og komu mjög kjánalega út fyrir vikið. Auk þess sást greinilegur munur á upplýsingagjöf þeirra til innlendra fjölmiðla annars vegar og erlendra hins vegar.
"Helsti galli margra íslenskra fjölmiðlamanna er nefnilega þörf þeirra fyrir að koma sjálfum sér á framfæri. Í stað þess að miðla upplýsingum reyna sumir fjölmiðlamenn að koma eigin skoðunum á framfæri..."
Helsti galli margra íslenskra stjórnmálamanna er nefninlega þörf þeirra fyrir að koma sjálfum sér á framfæri. Í stað þess að miðla upplýsingum reyna þeir að ota fram sínu eigin ágæti.
"Það sem er kómískt í þessu öllu er hvernig fjölmiðlamenn skýla sér á bakvið klisjur til að koma eigin skoðunum að eða til að hylma yfir illa undirbúna fréttavinnslu."
Það sem er sorglegt í þessu öllu er hvernig stjórnmálamenn skýla sér bakvið klisjur til að hylma yfir eigin vankunnáttu og slakan undibúning.
"Margir eru á þeirri skoðun að fjölmiðlar hafi brugðist eftirlitshlutverki sínu í þeirri kreppu sem nú gengur yfir."
Margir eru líka á þeirri skoðun að yfirvöld og eftirlitsstofnanir hafi rugðist eftirlitshlutverki sínu. Telur þú það ekki hræsni af þinni hálfu að ætla þér að tala fyrir skoðanir annara, en um leið að skamma aðra fyrir það sama?
"Að sjálfsögðu eiga fjölmiðlamenn að spyrja hvassra spurninga og ekki leyfa viðmælendum sínum að komast undan því að svara erfiðum spurningum."
En þegar pabbi þinn verður fyrir slíku á hann það til að svara með hreinum og klárum dónaskap og hroka sem er ekki sæmandi forsætisráðherra!
"Málefnaleg og gagnrýnin umræða hlýtur að vera það sem hver fjölmiðlamaður vill standa fyrir."
Það væri óskandi ef þetta ætti nú líka við um ríkisstjórnina, þ.e. að vilja leyfa málefnalega og gagnrýna umræðu. Í stað þess að reyna að stjórna því hvað má segja upphátt og hvað ekki. Þöggun er óvinur lýðræðisins!
"Án þess að gera lítið úr reiði fólks þessa dagana"
Og ert þú ekki að reyna að gera lítið úr reiði fólks, sem á fullan rétt á sér sökum vanhæfis og klúðurslegra vinnubragða æðstu ráðamanna?
"Í kvöldfréttum var aðalfréttin sú að lögreglan hefði beitt piparúða á fólk sem samkvæmt fréttinni var alsaklaust, enda bara að brjóta sér leið inn á lögreglustöðina til að sækja mann í haldi lögreglu! Fullkomlega eðlilegt, eða hvað?"
Nei, það er akkúrat ekkert eðlilegt við það að lögreglan beiti ólöglegum handtökum gegn þeim sem dirfast að vera óánægðir. Slíkt á meira skilt við fasisma en lýðræðisleg vinnubrögð. Þegar stór og samstilltur hópur fólks rís upp á móti slíku ofbeldi, þá er það að berjast FYRIR réttlæti en ekki gegn því.
"Þegar fjölmiðlar leggja blessun sín yfir það að æstur múgur ráðist inn á lögreglustöð, þarf að staldra við og hugsa málin upp á nýtt."
Ef þú heldur að fjölmiðlar hafi eitthvað sérstaklega "lagt blessun sína yfir það", þá ert það þú sem þarft að staldra við og hugsa málin upp á nýtt!!! Þegar stjórnvöld leggja blessun sína yfir valdníðslu þá er alræðið á næsta leiti.
"Slíkt sendir þau skilaboð út í samfélagið að ekki beri að fylgja lögum og reglum í landinu"
En virðingarleysi ráðamanna fyrir lögum og almennu siðgæði, hvaða skilaboð sendir það út í þjóðfélagið?
"Gárungarnir segja að ansi heitt sé orðið á fjölmiðla-grillinu og að tími sé til kominn að lækka hitann."
Þjóðin segir að ekki sé nógu heitt á stjórnmála-grillinu og að tími sé kominn til að hækka hitann undir þeim sem völdin hafa, fyrst þeir hafa ekki dug í sér til að víkja sjálfviljugir.
"Þjóðin öll heimtar málefnalega, gagnrýna og ábyrga fjölmiðlun þar sem grillveislum er stillt í hóf."
Þjóðin öll heimtar málefnalega og ábyrga stjórnarhætti, þar sem valdhroka, leynimakki og þöggun er ekki bara stillt í hóf, heldur útrýmt með öllu!
Lengi lifi byltingin!!!!!
Skráð þann 28.11.08 klukkan 12:02
Góður og þarfur pistill!
Skráð þann 28.11.08 klukkan 17:32
Ég held við ættum stundum að hlusta aðeins betur
á hugrenningar þeirra, sem erfa skulu land,
því kannski er næsta kynslóð, kynslóðin sem getur
komið fram með svörin, þar sem sigldum við í strand.
Okkur kann að virðast, að ungdómurinn nú
sé einskis nýtur, reki í lífsins gjólum.
En gleymum ekki staðreyndum, því staðreyndinn er sú:
Það vorum ég og þú, sem upp þau ólum.
[Jóhann G Jóhannsson og Vilhjálmur Vilhjálmsson]
Góður pistill.
Takk fyrir
Skráð þann 28.11.08 klukkan 20:08
Brilljant pistill Helga Lára!
Skráð þann 29.11.08 klukkan 10:02
Frábær pistill...
Frétt DV um hann, staðfesti efni pistilsins samdægurs.
Þú átt eftir að ná langt
Skráð þann 29.11.08 klukkan 10:05
Eins og mælt úr mínum munni, góður pistill Helga Lára.
Skráð þann 29.11.08 klukkan 18:36
Mjög góður pistill.
Virkilega sorglegt að sjá hvað fólk er tilbúið að fara á lágt plan í stað þess að fara í málefnalega gagrýni.
Við erum öll börn foreldra okkar. Ég trúi því ekki að fólk vilji samfélag þar sem fólk fær ekki að standa fyrir sjálft sig heldur er allt sem það segir og gerir sett í samhengi við hverra manna það er. Efast um að allir sem hér skrifa vilji að börn þeirra verði ævinlega og alltaf þekkt sem börn foreldra sinna en ekki fyrir það sem þau sjálf standa fyrir.
Skráð þann 30.11.08 klukkan 19:41
Fjölmiðlarnir fylgja valdinu og snúa staðreyndum valdinu í hag. Nú þegar fólk hér í landi er að finna afl sitt á götum úti og öðrum fundum finna fjölmiðlar að þetta fólk gæti verið valdaaðili í landi því sem mun rísa á rústunum. Verði fjölmiðlar varir við að valdi mótmælenda fari þverrandi og gamla peninga- og stjórnmálavaldið munu fjölmiðlar fylgja þeim og "grilla" gagnrýni á þessa aðila.
Viljir þú hlutlausa umræðu skalltu skoða hlutlausa fræðimenn því fjölmiðlar eru fylgihundar valdsins og munu halda áfram að gera það.
Skráð þann 01.12.08 klukkan 16:36
Þetta er góður pistill. Mér finnst Geir H. Haarde standa sig vel í þessum átökum. Hann er málefnalegur og rólegur. Lýðræði krefst virðingar fyrir réttum leikreglum, og óeirðaseggir, sem beita ofbeldi, vega að lýðræðinu. Ég er hins vegar ekki sammála Jóni Steinssyni um, að setja skuli atvinnubann á lýðræðislega kjörna fulltrúa eða fyrrverandi stjórnmálamenn. Við lifum sem betur fer í skipulagi, þar sem menn fá ekki völd með því að veifa prófskírteinum, heldur af því að þeir hafa unnið til trausts.
Skráð þann 01.12.08 klukkan 22:42
Kæra mannfólk
Það sem þarf að vera á tæru varðandi hugmyndir/skriftir manna hér á "blogginu" er að hér er um að ræða skoðanir sem eru einungis til íhugunar frá vissu sjónarhorni. Finnst mér því ómannlegt og sýna vott um rasisma að leggja ill persónuleg orð á manneskju sem greinilega er með vit í kollinum og ákveðnar skoðanir. Þó svo að hún Helga Lára sé dóttir mikilsmennis á hún með öllu réttu að vera brugðið við framgang fólks/fréttamanna.
Það er skýrt og greinilegt að við Íslendingar þurfum að fara að taka til, sem þjóð. Og eins og umræðan gengur út á eru það fyrst og fremst fjölmiðla tiltekt. Fjölmiðlar eiga að vera með öllu hlutlausir og afskiptalausir. Þeir eiga ekki að taka þátt í mótmælum með einum né öðrum hætti, né ýta undir þau.
Fram til dagsins í dag hafa þeir ótakmarkað vald til alls. Spillingin er orðin svo mikil meðal fjölmiðla að nánast hvað sem er, er birt. Það er óviðunandi og með öllu óheilbrigt. Fréttamiðill/fréttaflutningur á að vera með öllu sannur og réttur en ekki tilbúningur né tilgerður. Myndi þjóðinni ekki bregða í brún ef hún vissi (og ef satt væri)að þeir sem kaupa og hafa keypt fréttamiðla þá sem eiga við séu í raun spilltir til eigin hagsmuna. Eins og hvert annað "gossip" rit. - Fólk setur traust á sterka miðla og er að falla sjálfstætt af þeirra völdum -
Með vinsemd
Mannfólk
Skráð þann 01.12.08 klukkan 23:22
Þetta er fyrst og fremst þarfur pistill. Fjölmiðlar hafa leikið lausum hala síðustu mánuði og með ábyrgðarlausri framkomu sinni ýtt undir hræðslu á meðal almennings.
Sérstaklega er ég sammála Helgu um umfjöllunina um atburðina lögreglustöðina. Lögreglustöðin er opinber bygging. Ef æstur almenningur hyggst að brjóta sér leið inn þá gefur það auga leið að við slíkri framkomu verður lögreglan að grípa til aðgerða. Lögreglan er jú á launaskrá við að halda uppi lög og reglu.
Máttur fólksins er mikill, sem betur fer, og ég tel að hver og einn hafi rétt á að mótmæla og koma sínum skoðunum á framfæri. En ofbeldi leysir engann vanda og er þaðan af síður málefnalegt. Er hægt að gagnrýna stjórnvöld fyrir að stjórnleysi ef anarkí er svarið? Við erum ekki ofbeldissinnuð þjóð og það sannaðist einna best eftir að Bretar yfirlýstu okkur sem hryðjuverkamenn. Herlaus þjóðin með þorsk að vopni...
Kasta mat í Alþingið er heldur ekki sérlega kreppulegt heldur heimskulegt. Hafi fólk þörf til að losa sig við matvæli þá er fólk í samfélaginu sem þarf á því að halda.
Fjölmiðlar í dag eru valdamesta vopnið. Vopn sem ber að fara með varúð. Fjölmiðlar rétt eins og stjórnvöld þurfa að sýna ábyrgð.
Að lokum langar mig að koma því á framfæri að þessi ómálefnalega umræða sem sumir telja sig knúna til að koma að í kommentakerfinu er óþolandi í alla staði.
Skráð þann 03.12.08 klukkan 04:45
Hérna hinum megin á deiglunni er lausn á málinu, (http://www.deiglan.com/inde...), en það virðist enginn hafa neitt til málanna að leggja þar.
Hérna megin er fólk reitt að rífast.
Ég veit ekki með ykkur, en ég hef alltaf staðið í þeirri trú að það sé ekkert sniðugt að taka ákvarðanir í reiðiskasti.
Það væri miklu betra að fólk myndi spyrja. "Hvað getum við gert til þess að hjálpa til við að rétta þetta af."
Ísland hefur enn aðgang að svo miklu. T.d. rafmagnið, þótt það sé veðsett í erlendri mynt, þá er ekki hagkvæmt að flytja það út. Svo að við getum allt eins notað það.
Hitaveitan. Hún getur haldið okkur heitum ansi hreint lengi. Fólk getur farið í sund eða bað og sturtu og slappað af. Baðhúsa menning? Einhver til?
Svo eigum við vatn til að drekka.(Er það ekki best í heimi? ) Vá, djöfull erum við heppin. Vatn er eitthvað sem ekki allir geta sagt.
Hmmm. . svo eigum við líka mat. Við eigum fisk! Vá maður. Er fiskur ekki eitt það besta sem hægt er að hugsa sér að borða? Skulum nú vona að við getum reddað okkur smá af olíu á móti nokkrum tonnum.
Við getum svo notað rafmagnið til þess að splæsa í fleiri gróðurhús. . .VÁ! þá eigum við grænmeti líka. Hvaða grænmeti fílið þið best?
En beljur og dýr? Eigum við eitthvað þannig? Ok, þótt það sé líka veðsett, þá er enginn að fara að senda beljurnar okkar úr landi. Við höfum líka örugglega pláss fyrir fleiri rollur. Það þarf nú bara að senda hrútana í málið og hætta að súrsa þessi helvíti!
Svo eftir kvöldmat getum við hangið á netinu. (Vá. . .eigum við það líka?) Og horft á mótmælin í sjónvarpinu(Shit. . .hvað er í gangi? Hvað vantar okkur?).
Það hlýtur að vera eitthvað sem mér er að yfirsjást.
Afþreying? Íþróttahúsin? Við hljótum líka að geta höstlað okkur smá bygg og bruggað smá mjöð í landann. Nei! Bíðið, ég veit! BRENNIVÍN! Þetta ilhýra íslenska. . .
Hvað vantar okkur fleira. . .skóla? Nei, bækur. Kennara? Hvað er það sem vantar.
Plús það, ef okkur vantar eitthvað til að brenna og elda fiskinn, getum við notað bækur. Nei, bíddu, við eigum rafmagn?
Plús það ef við ættum ekki bækur gætum bara google-að þetta. Meira að segja Gordon Brown er ekki að fara að cötta á sæstrenginn.
Húsnæðisvandamál. . .daradaradara. . .höfum aldrei átt meira af húsum. Þeir sem hafa ekkert að gera geta bara fengið hamar frá MEST og örugglega nagla líka. Það er örugglega eitthvað til frá góðærinu í húsgögn, er ekki líka bara í tísku að vera með bera veggi, svona kaldir stílhreinir veggir?
Það hlýtur samt að vera eitthvað sem ég er að gleyma. . .
Hvernig eigum við að fá gjaldeyri inní landið svo við getum haldið áfram að lifa í einhverju rugli. . .Ahhhh, fólk? Eigum við eitthvað gott fólk eftir? Þeir sem stjórna landinu eru greinilega fífl með meiru, og restin hendir eggjum og gerir grín að fólki með því að setja Svínstrýi á plaggöt. Hvernig hefur þetta fátæka fólk efni á að prenta svona stór plaggöt? Eru þetta ekki DIGITAL prentarar í ofanálag?
EN!
Mínar stærstu áhyggjur eru þessar.
Ef við munum vera lokuð á þessu skeri næstu 10 árin, þá þýðir ekki að við séum búin að leggja allt í rúst og skipta okkur í stríðsfylkingar.
Það er ekki neitt leiðinlegra en að vera í partýi með leiðinlegu fólki, er að vera ennþá daginn eftir með fólkinu sem þú fórst bara að rífast við kvöldið áður. Það er líka bara ekki vænlegt til stórsigra.
Mín tillaga er því þessi.
Hugsum um gamla fólkið og pössum uppá börnin. Chillum aðeins og förum frekar að pæla í því hvað er leiðinlegt að hafa myrkur sona stóran hluta ársins.
Allt það besta í lífinu er ókeypis, fyrir utan það sem er frítt!
Lifið heil
- - - -
Skráð þann 03.12.08 klukkan 17:47
En hvað það er þreytandi að lesa í gegnum svörin við þessum pistli og sjá svona marga skíta í brækurnar og falla beint í þá gryfju sem Helga Lára talar um í grein sinni.
Í stað þess að tala um það sem greinin fjallar kemur eitthvað rugl um greinarhöfund sem tengist greininni engan veginn. Hvað þykist þið vita um það hvort greinarhöfundur er sammála föður sínum eða ekki í pólitík?
Það er eins og margir kunni ekki að hlusta á rökræðu og svara með hnitmiðuðum rökum á móti.
Þetta er alvarlegt mál en þegar þetta sama fólk er farið að vinna í fjölmiðlum snertir þetta alla. Fjölmiðlar og gæði þeirra skipta sköpum.
Það að einstaklingur segi hluti eins og: "Er það fjölmiðlum að kenna að þúsundir fjölskyldna sjá fram á að missa allt sitt á næstu mánuðum" sýnir á svarthvítu hversu skelþunnir rökræðuhæfileikar einstaklingsins eru og ég vona að sá og hinn sami láti það vera að vinna í fjölmiðlum.