Deiglan.com

Betarokk leiðir nýtt framboð í Stúdentapólitíkinni

Betarokk ásamt nánum samstarfsmanni á sellufundi. Aðspurð sagðist Beta hlakka sérstaklega mikið til að vinna með þessum tiltekna einstakling á næstunni.

Elísabet Ólafsdóttir, betur þekkt sem Betarokk, mun ef að líkum lætur leiða nýtt afl í komandi SHÍ kosningum ef marka má heimildir Flugufótarins. Undirbúningur að framboðinu hefur, að sögn heimildarmanna, staðið í um fjóra mánuði. Þrátt fyrir það hefur aflið sem stendur að framboðinu ekki enn verið formlega stofnað. Enginn hefur stigið fram sem talsmaður aflsins og engin stefna verið opinberlega kynnt á öllum þessum tíma. Það mun einmitt hafa stafað af skorti á öflugum talsmanni fyrir þær hugmyndir sem framboðið stendur fyrir.

Betarokk hefur verið mjög mikið í sviðsljósinu á síðustu misserum. Hæst ber bloggsíðu hennar sem varð fljótt ein mest lesna bloggsíða landsins. Einnig var bloggbókin hennar ein af mest seldu jólabókunum. Skömmu áður hafði hún vakið mikla athygli fyrir gleðskaparlýsingar í útvarpi. Elísabet ákvað reyndar að draga sig í hlé frá sviðsljósinu yfir hátíðirnar og lýsti því yfir á blogginu sínu að hún yrði að gera róttækar breytingar á lífsstíl sínum “til að halda geðheilsu”. Hún hyggst nú snúa galvösk og endurnærð til baka eftir um fjögurra vikna hvíld frá sviðsljósinu.

Ekki þarf að tíunda mikilvægi þess fyrir nýtt og óþekkt framboð með ný og óljós stefnumál að fá landsþekktan listamann til að vekja á sér athygli. Einnig þykir það mæla með Beturokk að hún hefur verið afar áberandi í félagslífi Háskólans í vetur.

Flestir aðstandenda nýja framboðsins hafa eitthvað garfað við stjórnmálastörf síðustu misseri en engu að síður verður framboðslistinn fullkomlega óháður listi skipaður fullkomlega óháðum frambjóðendum flestum úr röðum Vinstri grænna. Gæti nokkur frambjóðandi verið óháðari nokkrum manni en Betarokk?

Þrátt fyrir óumdeilda hæfileika Beturokk til að koma sér á framfæri stóð engu að síður nokkur styrr um þessa skipan mála. Ekki er við því að búast að framboðið nái nema einum fulltrúa af níu inn og hún því jafnframt í baráttusætinu. Vantraust á einstökum hæfileikum Beturokk var þó alls ekki ástæðan. Þeir heimildarmenn Flugufótarins sem eru úr innsta hring nýja aflsins sögðu að þvert á móti hefði verið um hugmyndafræðilegan grundvallarágreining að ræða. Mörgum aðstandenda framboðsins þótti það ekki í anda lýðræðislegra vinnubragða að koma framboðinu á framfæri við nemendur Háskóla Íslands.

Engu að síður hefur náðst ágæt sátt um þessa niðurstöðu eftir. Flugufóturinn hafði samband við Betu, sem vildi ekki staðfesta orðróminn. En hún sagðist vera orðinn hluti af þessum hópi fólks og myndi að sjálfsögðu vera á listanum eins og allir vinir aðstandendanna.

Aðspurð um þekkingu og áhuga á hagsmunamálum stúdenta svaraði Beta því hreint út að slíku væri “ekki til að dreifa”, en það væri "barasta alltílæ". T.d. sagðist hún lítt eða ekkert hafa kynnt sér "hvaðetta Stúdentaráð er" eða hver væru helstu hagsmunamál nemenda, enda væri það ekkert “issue”. Sjálf sagðist hún þó hafa mikinn áhuga á fleiri vísindaferðum. Innan framboðsins væri almenn samstaða um að leiðtogi á listanum þyrfti ekki að hafa nokkra reynslu af hagsmunastörfum. Aðalatriðið væri að hann skynjaði rómantíkina í því að upplifa sjálfan sig sem uppreisnarmann gegn kerfinu.

Beta viðurkenndi ennfremur að áhugi sinn á þessu verkefni hefði vaknað eftir mörg samtöl við listamenn og fagurkera sem hún kynntist eftir útgáfu bloggbókar sinnar. Þá hefði hún kynnst róttækum þjóðfélagshugmyndum og öðruvísi lífsstíl og látið hrífast með. (Þegar blaðamaður Flugufótsins hafði splæst einu staupi á hana í viðbót trúði hún honum reyndar fyrir því að henni sýndist líka af mörgum ástæðum heppilegra að leika stjörnu og vekja á sér athygli ef maður hefði einhvern málstað á vörunum.) Hún taldi sig eiga vel heima í þessum hóp af fólki og hlakkaði mikið til að fara með næst þegar ætti að fara í snjókast við Alþingishúsið!