Deiglan.com

Bláa byltingin

Flugufóturinn hefur nú afhjúpað enn eitt samsærið í undirheimum íslenskrar pólitíkur. Þegar unnusta afa eins fréttamanna Flugufótarins hugðist skrá sig í Sjálfstæðisflokkinn seint í gærkvöldi rak hún augun í að á skráningarblaðinu stóð „[ ] vil ekki vera í heimavarnarliði."

Ungliðarnir að máta nýju hermannafötin sín.

Einn Heimildarmanna Flugufótarins sem starfar á skrifstofu Sjálfstæðis-
flokksins sagði að hér hafi verið um mistök að ræða. Þessi tegund skráningarblaða hafi ekki átt að vera komin í umferð strax, enda væri ekki enn búið að kaupa byssurnar fyrir heimavarnarliðið.

„Hugmyndin er sú að Sjálfstæðisflokkurinn taki að sér varnir landsins. Það er bara eðlilegt og svo margt sem styður þá hugmynd. Þeim sem taka þátt í stjórnmálastarfi hlýtur að vera umhugað um hag lands og þjóðar, sem er kostur fyrir hermenn. Svo stóðu Hvítliðarnir sig svo helvíti vel þegar kommúnistar gerðu byltingartilraun á Austurvelli hér um árið, en það voru að upplagi Heimdellingar svo að reynslan er þar til staðar. Að lokum væri líka óheppilegt ef upp kæmu deilur milli vopnaðra manna og betra að þeir séu allir í sama flokki og hafi þannig minna til að rífast um. Þá gefur auga leið að Sjálfstæðisflokkurinn kemur best til greina, enda er hann langfjölmennastur með rúmlega 21 þúsund félaga." Sagði heimildarmaðurinn sem einkar rík ástæða er til að treysta.

Að sögn heimildarmannsins verða allir skráðir félagar í Sjálfstæðisflokknum sjálfkrafa félagar í heimavarnarliðinu. Nýir félagar geti þó hakað við á inntökubeiðni í flokkinn ef þeir vilja ekki vera með. Jafnframt muni þeir sem skrá sig á póstlista flokksins vera í aukavaraliði, en þeir munu aðeins fá send heim léttari vopn, en ekki sjálfvirkar hríðskotabyssur eins og flokksfélagar.

„Auðvitað hafa komið upp ýmsar hugmyndir samfara þessu. Lýðræði snýst náttúrulega fyrst og fremst um að ná sátt í þjóðfélaginu svo ekki logi allt í illdeilum. Það ætti að vera auðvelt að halda aga og sátt í þjóðfélaginu með svona öflugu herliði og þannig ekki víst að það þurfi endilega að hafa kosningar. Til dæmis gæti herforingjaráðið bara stjórnað landinu. Það sem til sparast gæti nýst til stríðsreksturs. Það eru kannski ekki mörg lönd sem við gætum haft undir, en hugmyndir á borð við Lúxemborg og Tuvalu eyjar hafa komið fram."

Heyrst hefur að heimavarnarliðið verði notað til að tryggja völd Sjálfstæðisflokksins í landinu. Heimildarmaður Flugufótarins vildi hvorki játa því né neita en sagðist geta staðfest það svo lengi sem það kæmi ekki fram í skrifum Flugufótarins. „Sko bylting er nú ekki rétta orðið, það er svo kommúnískt sjáðu, og svo étur hún líka börnin sín. Við erum að spá í að kalla þetta Frelsun eða jafnvel Þjóðfrelsun. Ég held að fólk verði bara ósköp fegið að þurfa ekki lengur að pæla í því hvað það á að kjósa."

Mikill metnaður ríkir í herbúðum undirbúningsnefndarinnar sem leggur drög að stofnun heimavarnarliðsins. „Já, það er ekki spurning. Við ætlum sko að sýna að þetta verður enginn sveitamannaher. Til dæmis ætlum við að setja upp stærsta jarðsprengjubelti í Evrópu á Kárahnjúkasvæðinu og gera vikulegar loftárásir á Svía. Við viljum náttúrulega helst sprengja Norðmenn, en þeir eru í NATÓ líka og Svíar eru næsta land við svo það verður að duga."

Aðspurður sagði heimildarmaðurinn að helsta áhyggjuefni undirbúningsnefndarinnar væru agavandamál. Herða þyrfti flokksagann gríðarlega, en hann hafi ekki verið nægilega mikill hingað til. Alltaf séu einhverjir sem ekki séu tilbúnir að fylgja línunni. Það ætti þó að vera tæmandi vandamál þar sem stefnt er að því að allir liðhlaupar verði skotnir.